ALKATIRI: GOVERNO GASTA OSAN ARBIRU; GASTA BA RESOLVE PROBLEMA IHA GOVERNASAUN ALKATIRI NIAN

Rekonstruksaun;

Iha loron 24 Janeiro 2012, via ekran TVTL, Mari Alkatiri Aktual Sekretariu Geral Partidu FRETILIN nian, halo kritika ida hasoru Governu AMP nebe lidera husi Kayrala Xanana Gusmao. Alkatiri hato’o katak, durante governasaun Xanana gasta povo nia osan barak milioes dolares maibe povo la senti nia resultatu, nia haktuir. Tuir FRETILIN nia versaun katak besik ona tinan 5 maibe laiha mudansa iha povo nia moris. Liafuan hanesan laos deit mai husi Sekretariu Geral Partidu FRETILIN maibe mos hato’o husi nia Deputadu sira iha parlamentu Nasional.

Laos ona novidade ba publiko no pavo tomak katak, durante tinan 5 nia laran, Partidu FRETILIN nebe sai hanesan opozisaun iha Parlamentu, sempre hato’o kritika no komentarius barak, tantu iha diskusaun konaba orsamentu, plenaria babain, konferensia pers no mos iha aktividade konsolidasaun sira. Hanesan opozisaun iha duni responsabilidade no dever atu kontrolu governu nia lalaok no implementasaun to’o ezekusaun orsamentu nian. Maibe dala barak buat nebe ita observa mak, komentariu hirak ne’e ladun refleta ba situasaun nebe mosu iha kraik.

Tuir versaun Depotadu AMP nian iha Parlementu Nasional katak, iha duni mudansa no situsaun kontente iha povo nia le’et wanhira sira ba halo fiskalizasaun iha terenu. Hirak ne’e tuir Depotadu AMP nian katak, tamba programa no intervensaun governu nian lori duni benefisiu balun ba povo nia moris. Hotu-hotu koalia konaba povo nia moris, tantu governu nune’e mos opozisaun iah Parlamentu.

Tuir versaun partidu hirak nebe halibur iha AMP, liu-liu partidu CNRT, sira konfirma katak, osan nebe gasta, gasta ba povo nia nesesidade no povo nia interese. Liu tan ida ne’e, sira hateten osan nebe gasta barak liu mak resolve problema sira nebe mosu iha Governasaun FRETILIN, hanesan Problema Petisionariu, Problema IDP rihun ba rihun iha Dili laran no mos iha Distirtu balun.

Tuir Relatorio Governo AMP nian iha tinan daruak, wanhira relata iha Parlamentu Nasional haktuir mos katak, tinan primeiro, Governo hasai duni osan barak para so resolve deit problema sira nebe Governo Anterior husik hela, hanesan Petisionariu sira, IDP nian no mos dividade sira seluk nebe husik hela husi Governasaun FRETILIN nian. (JC)