Partidu CNRT Sei Fo Sansaun Ba Militante Ne’ebe Maka Lori Partidu CNRT Nia Naran Fo Apoiu Ba Kandidatu Seluk

Dili MLP, Partidu Kongresu Nasional Rekostruksaun Timor Leste-CNRT hanesan Partidu boot iha Nasaun Timor Leste, tanba ne’e desizaun hotu sei foti husi Lideransa Masimu, laos Individu ida Lori Partidu CNRT nia Naran hodi fo apoiu ba Kandidatu Prezidente Republika ida ne’ebe maka la tama Kriteria Partidu CNRT nian.

“Ema ne’ebe maka lori Partidu CNRT nia naran deklara hodi fo apoiu ba Kandidatu Prezidente Republika seluk ne’ebe maka la tama criteria Partidu CNRT nian, ema ne’e sei hetan sasaun husi Partidu CNRT, karik ema seluk maka haruka” dehan Koordenador Partidu CNRT Distritu Dili Zeca Smit, Relasiona ho esteitmentu husi Joventude ida ne’ebe maka lori PArtidu CNRT nian naran hodi Fo apoiu ba Kandidatu Prezidente ne’ebe maka la tama kriteia P-CNRT nian.

Tuir Nia katak Partidu CNRT foti ona desizaun hodi fo apoiu masimu ba Kandidatu Prezidente Republika periode 2012-2017 Jose Maria de Vasconselo(Taur Matan Ruak), tanba ne’e husu ema ida la bele lori Partidu CNRT nia naran fo apoiu ba kandidatu seluk. “Ema ne’ebe maka deklara hodi fo apoiu ba kandidatu seluk, ema seluk maka haruka ou ninia hakarak rasik tanba ne’e buka tuir ema ne’e hodi fo sansaun ba ema ne’e” infoma Zeca Smit, wainhira halo enkontru ho Strutura P-CNRT Distritu Dili, iha Cede P-CNRT Bairo dos Gliros, sesta 24/2.

Iha sorin seluk Sekretariu Jeral Partidu CNRT Dionisio Babo katak ema ida ne’ebe maka lori partidu CNRT nia naran fo apoiu kandidatu seluk, ne’e dekrasaun individual, tanba desizaun Partidu CNRT nian maka sei fo apoiu ba kandidatu Prezidente Republika Independente.

“Partidu CNRT nia desizaun maka fo apoiu masimu ba kandidatu Prezidente Republika Independente  maibe tenki tama criteria Partidu CNRT nian, no la fo Apoiu ba Kandidatu Prezidente Republika ne’ebe maka mai husi Partidu” dehan Dionisio Babo.

Nia hatutan katak ema tenki respeitu no simu desizaun Partidu nian, katak Partidu CNRT sei fo apoiu ba Kandidatu Prezidente Republika Independente Taur Matan Ruak.

Nune’e  Vice Prezidente Partidu CNRT Bilo Mali katak Partidu CNRT sei fo nia apoiu masimu ba Taur Matan Ruak, tanba ne’e ema ida la bele lori Partidu CNRT nia naran hodi fo apoiu ba Kandidatu seluk.

“Laos Partidu CNRT deit maka fo apoiu ba Kandidatura Taur Matan Ruak Maibe  Strutura Rezistensia hotu maka fo apoiu ba kandidatu Taur Matan Ruak, tanba ne’e ema ida labele lori Partidu CNRT nia Naran hodi fo apoiu ba kandidatu Seluk” dehan Bilo Mali.

http://www.partidocnrt.com/index.php?option=com_content&view=article&id=1261:partidu-cnrt-sei-fo-sansaun-ba-militante-neebe-maka-lori-partidu-cnrt-nia-naran-fo-apoiu-ba-kandidatu-seluk&catid=29:notisia-cnrt&Itemid=154