Press Release

Taur Matan Ruak: Hau Prontu Atu Lakon no Koliga ho Povu

05 Fevereiru 2012, “Timor-Leste Nasaun Demokrátíka ida, no ita boot sira iha direitu demokraátíka atu vota ba kandidatu sira seluk. Naran katak, tenke hili ho konsiénsia”, ida-ne’e maka resposta hosi Kandidatu Prezidente Independente, Taur Matan Ruak, bainhira nia simu perguntas hosi joven balun iha ninia vizita ba Uatu Carabau, Viqueque, iha 20 Novembru 2011.

Iha ninia vizita ba fatin seluk hanesan Gariuai no Venilale, iha distritu Baucau, Sr.Sr. Taur Matan Ruak, hatán  firme hodi dehan katak nia prontu atu lakon hodi halo serbisu ho povu hodi dezenvolve nasaun Timor-Leste bainhira karik maka nia lakon iha eleisaun prezidensial ne’ebé atu hala’o iha 17 fulan Marsu 2012. Nia hatutan katak agora nia halao hela funsaun hanesan “politiku” no funsaun “hanesan sidadaun no funsaun hanesan sidadaun maka principal liu”.
Bainhira membru komunidade Gariuai balun husu nia liu tan kona-ba kandidatura ba eleisaun prezidensial no ninia aliansa bainhira eleisaun prezidensial to’o karik iha segunda ronde, Sr. Matan Ruak, klarifika katak, nomeiasaun kondidatu bara-barak ne’e atu sobu vota no dudu eleisaun prezidensial ba segunda ronde. Maibé, Taur Matan Ruak hatán katak, nia sei la halo aliansa ho partidu politíka tanba nia kandidatu independente, nune’e aliansa ida de’it ne’ebé nia atu forma maka ho povu de’it.
Hakarak mós atu klarifika katak, dezde tempu nia rezigna hosi ninia kargu nu’udár Major Jeneral ba Forsa Defeza Timor-Leste nian no bazeia ba ajenda kompromisus vizita hirak-ne’ebé Sr. Matan Ruak, hala’o ona to’o daudaun ne’e hamutuk ona vizitas 107 ne’ebé hahú hosi fulan Otubru 2011 to’o Fevereiru 2011.
Haree fali ba Taur Matan Ruak ninia deklarasaun hirak ne’ebé temi daudaun ne’e hatudu momos katak, Matan Ruak hakarak fó hanoin dala ida tan kona ba ninia deklarasaun bainhira simu kandidatura hosi apoiante sira bainhira ba rejistu iha 16 Janeiru 2012 iha ne’ebé Matan Ruak deklara katak ninia kandidatura la kontra ema ida, maibé atu halibur la’ós atu atu fahe”. No haktuir fali ba nia prioridade hirak bainhira povu hili nia ba Prezidente Republika, ninia prioridade importante hirak maka atu haree ba oinsá hodi atu asegura independensia no unidade nasional, asegura integridade territorial, hametein identidade, asegura funsionamentu orgaun estadu hotu tuir konstitusaun no mós haree ba oinsá hodi kria prosesu tranzisaun jerasional hodi fó fiar-an rasik (auto-konfiansa) ba foinsa’e sira hodi hamriik bá oin iha áreas hotu hotu.

- Final –