Baucau- MLP, Prezidente Partidu CNRT, Kay Rala Xanana Gusmão fó pose ba koordinador sira Nurep no Selkom husi Sub-distritu neen iha Distritu Baucau, loron 25, fulan Fevereiru, tinan 2012.Iha eventu ne’e , Prezidente P-CNRT Kay Rala Xanana hamutuk ho militante no simpatizante sira husi sub-Distritu neen halo desfile haleu sidade Baucau, husi vila antiga to’o vila nova no fila fali ba vila antiga. Hafoin liu tiha atividade desfile, sira fila fali ba fatin konsolidasaun hodi hala’o atividade tuir ajenda ne’ebé trasa ona husi komisaun organizadora P-CNRT Baucau.
Iha diskursu dauluk husi Koordinador Distritu Baucau, Francisco da Costa Ikulai hato’o katak iha lista militante sira P-CNRT Baucau relata ona 2.384 militante maibe sei iha barak mak seidauk hatama hotu. Nia mos apela ba militante no simpatizante sira hotu katak tenke iha kuidadu ho propaganda polítika husi figura seluk tamba laiha figura seluk hanesan Maun Boot Xanana. Iha oportunidade ne’e mos, koordinador partidu PSD deside nia an hamutuk ho ninia militante sira 140 hodi afilia ba P-CNRT. Ninia presenza sai ezemplu diak no furak tamba haree ba vizaun polítika, nia hatene diside dalan los ba nia no nian militante sira.
“Hau deside hodi afilia ba P-CNRT tamba figura Maun Boot Xanana ne’ebé hamutuk no terus ho povu iha tinan 24 nian laran no agora nia buka atu hasai povu husi mukit no susar laran . Hau afilia ba P-CNRT tamba hau hakarak hamutuk ho Maun Boot Xanana ne’ebé uluk hamutuk ho ita iha terus laran no mos agora hamutuk ho povu atu hasai povu husi terus no mukit”, deklara Pedro Damião.
Reprezentante Feto OPMT, Carlota Pereira , husi Sub-distritu Baguia mos deklara iha públiku hodi afilia ba P-CNRT. Iha deklarasaun ne’e, nia hateten katak nia nu’udar feto ida ne’ebé mos hala’o atividade polítika hamutuk OPMT sira seluk iha nia Sub-distritu maibe iha loron 25, fulan Fevereiru, nia deside hodi afilia ba P-CNRT tamba nia hakarak hamutuk ho Maun Boot Xanana, figura realista no transformadora. Carlota mos fo ninia lian menon katak tenke hasae kapasidade feto nian iha área oi-oin atu nune’e bele kompete ho mane sira iha kontestu polítiku.
“Hau iha lian menon hat ba Lideransa sira P-CNRT: primeiru buka hasae kapasidade feto atu bele hetan fatin hanesan mos ho mane sira; segundu emansipasaun feto iha vida polítika; terseiru partisipasaun polítika no kuartu envolvimentu polítiku” sujere Carlota.
Hafoin remata deklarasaun husi militante rua ne’e, Prezidente P-CNRT Xanana fó liafuan bem-vinda ba sira nain rua no husu ba sira no ninia militante sira atu hamutuk ho P-CNRT had’ia ita nian povu nian moris no fó onra ba matebian sira ne’ebé sosa isin no ran ba rai ida ne’e.
Tidak ada komentar:
Posting Komentar